मास मिडिया संवादाता (काठमाडौँ)– प्रसिद्ध नेपाली–भारतीय गायक तथा अभिनेता प्रशान्त तामाङको असामयिक निधन भएको खबरले नेपाली तथा भारतीय मनोरञ्जन जगतलाई स्तब्ध बनाएको छ। इन्डियन आइडल सिजन ३ का विजेता तामाङको निधन भारतको दिल्लीस्थित निवासमा भएको बताइएको छ। उनको निधनको खबर सार्वजनिक भएसँगै सामाजिक सञ्जालमा शोक सन्देशको ओइरो लागेको छ भने संगीतप्रेमी, कलाकार तथा शुभेच्छुकहरूले गहिरो दुःख व्यक्त गर्दै श्रद्धाञ्जली अर्पण गरिरहेका छन्। सरल स्वभाव र प्रेरणादायी जीवनका कारण उनी सधैं दर्शक–श्रोताको मनमा बस्न सफल भएका थिए।
दार्जिलिङमा जन्मिएका प्रशान्त तामाङले सुरुवाती दिनमा भारतीय प्रहरी सेवामा रहेर पनि संगीतप्रतिको आफ्नो सपना जीवित राखे। मेहनत, लगनशीलता र जनसमर्थनको बलमा उनले इन्डियन आइडलको उपाधि जित्दै अन्तर्राष्ट्रिय स्तरमा नेपाली समुदायको पहिचान स्थापित गरेका थिए। नेपाली भाषा र संगीतलाई विश्वमञ्चमा चिनाउन उनले खेलेको भूमिका महत्वपूर्ण मानिन्छ। उनको असामयिक निधनले नेपाली संगीत तथा चलचित्र क्षेत्रमा अपूरणीय क्षति पुगेको छ, र उनी सधैं आफ्ना गीत, योगदान र प्रेरणादायी यात्राका कारण सम्झिइरहनेछन्।
