एमएमआई संवादाता (काठमाडौँ)– देशभर जारी अविरल वर्षाका कारण शनिबार पाँच प्रमुख राजमार्ग पूर्ण रूपमा अवरुद्ध भएका छन्। नेपाल प्रहरीले सार्वजनिक गरेको तथ्याङ्क अनुसार बाढी र पहिरोका कारण सङ्खुवासभाको कोशी राजमार्ग, रसुवामा चीनको नाका जोड्ने पासाङ ल्हामु राजमार्ग, सिन्धुपाल्चोकको अरनिको राजमार्ग, रुकुम पश्चिम र डोल्पाको भेरी करिडोरका विभिन्न खण्डमा पूर्ण रूपमा सवारी आवागमन रोकिएको हो। लगातारको वर्षाले सडकको भौतिक संरचना भत्किनुका साथै पहिरोको जोखिम पनि बढेको जनाइएको छ।
यसैबीच गण्डकी र लुम्बिनी प्रदेशका केही सडकहरूमा पहिरो हटाउने कामसँगै एकतर्फी यातायात सञ्चालन गरिएको छ। बागलुङ र गुल्मी भएर जाने कालीगण्डकी करिडोर तथा रोल्पाको शहीद राजमार्गमा सावधानीपूर्वक सवारी साधन सञ्चालन भइरहेको प्रहरीले जानकारी दिएको छ। ती सडक खण्डहरूमा आवश्यक उपकरण र जनशक्ति परिचालन गरी सुरक्षासहित सवारी आवतजावत व्यवस्थापन गरिँदैछ।
प्रहरीका अनुसार अवरुद्ध सडकहरू खुलाउने प्रयास तीव्र रूपमा अगाडि बढाइएको छ। यद्यपि मौसमका कारण उद्धार र मर्मत कार्यमा चुनौती देखिएको छ। प्रहरीले यात्रुहरूलाई यात्रा सुरु गर्नु अघि सम्बन्धित सडकको अवस्थाबारे जानकारी लिन, आवश्यक परेमा वैकल्पिक मार्ग प्रयोग गर्न र जोखिमयुक्त क्षेत्रबाट टाढा रहन अनुरोध गरेको छ। साथै स्थानीय प्रशासन र सुरक्षा निकायले अवस्था सुधार गर्न आवश्यक समन्वय गरिरहेका छन्।
