नयाँ दिल्ली : भरतपुर महानगरपालिकाकी पूर्वमेयर रेनु दाहाल भारतको राजधानी नयाँ दिल्लीमा आयोजना हुन लागेको प्रतिष्ठित ‘एनएक्सटी समिट २०२६’ मा वक्ताका रूपमा सहभागी हुने भएकी छन्। भारतको राज्य सभाका सांसद कार्तिकेय शर्माले दाहाललाई औपचारिक निमन्त्रणापत्र पठाउँदै सम्मेलनमा विशिष्ट वक्ताका रूपमा सहभागी हुन आमन्त्रण गरेका हुन्। उक्त अन्तर्राष्ट्रिय सम्मेलनमा विभिन्न देशका राजनीतिक नेतृत्व, नीति–निर्माता, उद्यमी, शहरी विकास विज्ञ तथा युवा नेतृत्वहरू सहभागी हुने कार्यक्रम रहेको बताइएको छ। सम्मेलनको मुख्य उद्देश्य विश्वव्यापी रूपमा परिवर्तन भइरहेका राजनीतिक, आर्थिक र सामाजिक परिवेशमा नयाँ सोच, नवीन नेतृत्व र दिगो विकासका अवधारणामाथि बहस तथा छलफल गर्नु रहेको आयोजकले जनाएको छ।
पूर्वमेयर दाहालले सम्मेलनमा नेपालका स्थानीय तहको अनुभव, शहरी व्यवस्थापन, महिला नेतृत्वको सशक्तीकरण तथा स्थानीय शासन प्रणालीका उपलब्धिबारे आफ्नो धारणा राख्ने अपेक्षा गरिएको छ। विशेषगरी भरतपुर महानगरपालिकामा उनले मेयरका रूपमा काम गर्दा हासिल भएका विकासका अनुभव, सेवा प्रवाहमा अपनाइएका नयाँ अभ्यास र स्थानीय विकासका चुनौतीहरूबारे अन्तर्राष्ट्रिय मञ्चमा प्रस्तुत गरिने बताइएको छ। आयोजकका अनुसार ‘एनएक्सटी समिट २०२६’ मा विश्वभरका प्रभावशाली व्यक्तित्वहरूबीच समसामयिक मुद्दा, नवप्रवर्तन, सुशासन, आर्थिक सहकार्य तथा क्षेत्रीय विकासका सम्भावनाबारे गहन संवाद हुने छ। सम्मेलनले नयाँ पुस्ताको नेतृत्वलाई विश्वस्तरमा जोड्ने र अनुभव आदान–प्रदान गर्ने साझा प्लेटफर्मको रूपमा काम गर्ने अपेक्षा गरिएको छ।
रेनु दाहाल नेपालका प्रमुख महिला राजनीतिक नेतृमध्ये एक हुन्। उनले भरतपुर महानगरपालिकाको नेतृत्व सम्हाल्दा शहरी पूर्वाधार विकास, पर्यटन प्रवर्द्धन, सरसफाइ व्यवस्थापन र सेवा प्रवाह सुधारमा विभिन्न पहलहरू अघि बढाएकी थिइन्। स्थानीय तहको नेतृत्वमार्फत उनले महिला सहभागिता र नेतृत्व क्षमताको उदाहरण प्रस्तुत गरेको टिप्पणी हुँदै आएको छ। उनको अन्तर्राष्ट्रिय सम्मेलनमा सहभागितालाई नेपालका स्थानीय सरकारको अनुभवलाई विश्वमञ्चमा पुर्याउने अवसरका रूपमा पनि हेरिएको छ। यसले नेपाल र भारतसहित दक्षिण एशियाली क्षेत्रका शहरी विकास र सहकार्यका सम्भावनाबारे थप संवाद विस्तार गर्न सहयोग पुग्ने विश्वास व्यक्त गरिएको छ।
‘एनएक्सटी समिट २०२६’ आगामी दिनमा नयाँ दिल्लीमा आयोजना हुने तय भएको छ। सम्मेलनमा विभिन्न विषयगत सत्र, नीति–संवाद, अनुभव आदान–प्रदान तथा नेतृत्व विकाससम्बन्धी विशेष कार्यक्रमहरू समेत समावेश हुने आयोजकले जनाएको छ।
