देशभर जनै पूर्णिमा तथा रक्षाबन्धन पर्व धूमधामसँग मनाइँदै

MMI संवादाता-  आज देशभर जनै पूर्णिमा, ऋषि तर्पणी तथा रक्षाबन्धन पर्व धार्मिक श्रद्धा र आस्थाका साथ मनाइँदैछ। यो पर्व विशेषगरी हिन्दू धर्मावलम्बीहरूका लागि पवित्र अवसर मानिन्छ, जसमा नव यज्ञोपवीत (जनै) धारण गर्ने र दाजु-बहिनीबीच रक्षा सूत्र बाँध्ने परम्परा रहिआएको छ।

यस दिन ब्राह्मण समुदायले वैदिक विधिअनुसार ऋषितर्पण तथा स्नान, संकल्प, हवन लगायतका कर्म सम्पन्न गरी नयाँ जनै (यज्ञोपवीत) धारण गर्छन्। अर्कोतर्फ, दाजुभाइको दीर्घायु र सफलता कामना गर्दै बहिनीहरूले रक्षाबन्धन बाँध्ने चलन छ।

पर्वका अवसरमा देशका विभिन्न मठ–मन्दिरहरूमा विशेष पूजा–अर्चना तथा तर्पण कार्यक्रमहरू आयोजना गरिएको छ। धार्मिक मान्यताअनुसार आजको दिन जनै फेरिँदा शरीर र आत्मा दुवै पवित्र हुने विश्वास गरिन्छ।